محبت پائي مـَـنَ ۾، رَنڊا روڙيا جـَـنِ،
تـَـن جو صرافـَـن، اڻ توريو اَگهائـِـيو. شاھ سائين
منير حيدر
ھن ڪائنات ۾ وقت سڀ کان وڏي وَٿ آھي، جيڪو اسان کي زندگي جي روپ ۾ مليل آھي ۽ انھي زندگي جو اصل جوھر محبت آھي. گذريل وقت اسان جي سڀ کان وڏي ۽ بيشتر قيمتي سيڙپ ھئي. ان سان اڄ اھو سوال پيدا ٿو ٿئي تہ ان سيڙپ جي بنياد تي اسان ڪيتري محبت جي ڪمائي ڪري سگھيا آھيون؟
ڇا اسان زندگي جي گذريل سالن ۾ محبت کان واقف ٿي سگھيا آھيون ؟ يا رُڳي پاڻي پئي ولوڙيو آھي!
محبت کان سواءِ اسان جون خوشيون ڪيڏيون نه خسيس ٿي پيون آھن، اسان پاڻ ڪيڏا نه ننڍڙا ۽ تمام ننڍڙا ۽ سطحي ماڻھو ٿي پيا آھيون. اسان کي ڪيڏو نه وڏو، ڪيڏو نه وسيع، سچار، سورھ ۽ مددگار ٿيڻ کپي ھا. اسان جي آس پاس سچائي، خلوص، محبت، ھمدردي ۽ پنهنجائپ موڪلائيندي وڃي ۽ محبت جي ھر احساس جي جاءِ تي ٻھروپ، فريب ۽ جڙتو روپن جڳھہ والاريندو وڃي. ڇا اسان جون اکيون اڇيون ٿي پيون آھن يا اسان سچائي کي سڃاڻندي بہ کڻي اکين تي ھٿ رکيا آھن. ڪنھن ۾ به فراخدلي، نيڪ نيتي ۽ محبت جو حوصلو ۽ اعتماد ڪونھي رھيو، ھرڪو پنھنجي خسيس، تنگ نظر جبلتن جو غلام ٿي پيو آھي.
نئين سال جي شروعات نئين سوچ سان ڪرڻ گھرجي، پنھنجي ذات ۾ احتساب جھڙي قوت کي اُڀارڻ گھرجي ۽ پنھنجي ذات جي نفرت جھالت جي گُگھہ اونداھين ۾ محبت، محنت ۽ علم جو ڏيئو ٻارڻ گھرجي جئين ايندڙ آنڌي ۾ منھن ڀر ڪرڻ کان بچي سگھجي. اسان کي خسيسپڻي مان نڪري پنھنجي سوچ، پنھنجي ويچار ۾ ھڪ ڪائنات ٿيڻ جي ضرورت آھي ڇاڪاڻ ته ايندڙ سال ايندڙ وقت ايندڙ حالات اسان منجھان اھا ئي توقع رکن ٿا. اسانکي نفرت، حسد، سازش ۽ ڪيني کي دل مان نيڪالي ڏيئي محبتن جا سڀ دروازا کولڻ کپن. ماءُ پيءُ جھڙا لاطمع رشتا، انھن جو محبت ڀريو احساس جيڪي خدا طرفان وڏيون نعمتون آھن، سي محبت جا سڀ کان وڏا مثال آھن. نئون سال انھن لازوال نعمتن ۽ رشتن جي حوالي ڪرڻ گھرجي. انھن لاء محبت جا سڀ دروازا کولي ڇڏڻ گھرجن، انھن کي وقت ڏيڻ انھن سان گڏ ويھڻ انھن جي اڪيلائين کي دور ڪرڻ انھن جو ٻانھن ٻيلي ٿيڻ گھرجي.
فطري زندگي جي شناس ئي حقيقي زندگي جي معرفت آھي. خدا جي ڪائنات اوھان لاءِ اُتساھ جو سڀ کان وڏو سبب آھي. قدرت جون ھزار نعمتون سج، چنڊ، آسمان، تارا، ڍنڍون ڍورا، وڻ ٽڻ، پکي پکڻ، گلن جا ھزارين قسم ۽ انھن جون خوشبويون جيڪي دل کي فرحت ۽ راحت بخشين ٿيون، اسان کي گھرجي تہ انھن جا ٿي وڃون ۽ پوءِ يقينن ائين ڪرڻ سان اسان ننڍڙين ننڍڙين انيڪ خوشين کان واقف ٿيندا سين. اسان کي گھرجي تہ نئين سال ۾ ان رستي تي وک وڌايو ۽ پنھنجي نئين سفر جي شروعات ڪيون، يقينن محبت جي ان سفر جي منزل ڏاڍي خوبصورت ھوندي.
No comments:
Post a Comment
براءِ مھرباني اھڙو ڪوبہ فضول لنڪ ڪمينٽ باڪس ۾ شيئر نہ ڪندا